Tölvur hafa í gegnum tíðina þótt vera traustur og áreiðanlegur upplýsingamiðill, bæði fyrir börn og fullorðna. Hin öra þróun tölva, svo og hversu útbreidd tölvunotkunin er, hefur valdið byltingu á sviði fjarskipta og upplýsingamiðlunar. Með einu litlu tæki (módem) og símalínu geta börn og fullorðnir nálgast upplýsingar um nánast hvað sem er. Hafa skal þó í huga að ýmsar hættur verða á vegi barns sem vafrar eftirlitslaust um Netið.
Flestar Netþjónustur bjóða upp á einhverskonar alfræðifróðleik, yfirlit nýjustu frétta, aðgang að bókasöfnum og fleira gagnlegt. Börn geta líka spilað leiki og haft samskipti við vini sína í gegnum tölvur. Möguleikinn á að „hoppa“ frá einum stað yfir á annan höfðar til hvatvísi og forvitni í börnum svo og þörf þeirra fyrir fjölbreytileika.
Flestir foreldrar kenna börnunum sínum að tala ekki við ókunnuga, hleypa ekki ókunnugum inn séu þau ein heima og gefa ekki upplýsingar í síma. Foreldrar fylgjast líka grannt með ferðum barna sinna, við hverja þau leika sér, hvaða bækur þau lesa og hvað þau horfa á í sjónvarpi. Hinsvegar vita margir foreldrar ekki að sömu aðgæslu er þörf á Netinu .
Foreldrar geta ekki gert ráð fyrir því að börn þeirra séu varin af gæslunni sem netþjónusturnar veita. Flest „spjallherbergi“ og „fréttahópar“ eru algerlega án eftirlits. Barnið veit ekki hvort það er að tala við annað barn eða ungling eða barnaníðing sem þykist vera barn af því að flest samskipti eru nafnlaus eða undir dulnefni. Ólíkt heimsóknum til barnsins og hægt er að fylgjast með, getur foreldri ekki eins haft eftirlit með tölvunni. Því miður hefur vafur barns á Netinu hlotið skelfilegar afleiðingar. Þá hefur barnið fallist á að gefa einhverjum persónulegar upplýsingar (nafn, lykilorð, heimilisfang og símanúmer) og/eða hitt viðkomandi í eigin persónu.
Önnur vandamál og hættur:
· Barnið kemst inn á síður sem eru óviðeigandi og yfirþyrmandi
· Barnið kemst inn á síður þar sem ofbeldi og klám er lofað
· Barnið er platað með auglýsingum
· Barninu er boðið að ganga í klúbba eða nýta sér þjónustu sem krefst þess að það veiti viðkvæmar persónuupplýsingar
· Að eyða of miklum tíma á netinu getur hamlað eðlilegan félagsþroska barnsins
Til að tryggja örugga og gagnlega dvöl barnsins á netinu skaltu:
· takmarka tímann sem barnið er nettengt
· kenna barninu að tali það við ókunnuga á netinu er það alveg sama og að tala við ókunnuga úti á götu
· brýna fyrir barninu að veita aldrei persónuupplýsingar
· brýna fyrir barninu að hitta aldrei neinn sem það hefur kynnst á netinu
· ekki láta barnið fá greiðslukortanúmer svo það geti nýtt sér þjónustu gegn gjaldi
· minna barnið á að það sem það les á netinu þarf ekki endilega að vera satt
· nýta þér möguleikann á að búa til „bannsvæði“ sem barnið kemst ekki inn á
· láta barnið aðeins fá netfang ef þú treystir því til þess og hafðu umsjón með því
· minna barnið á að þessar reglur gilda um allar tölvur, hvort sem er heima, í skólanum eða hjá vinum.
Foreldrar ættu að hafa í huga að samskipti í gegnum tölvur býr ekki börn undir eðlileg mannleg samskipti. Ef foreldri eyðir tíma með barninu í að skoða hvað er í boði á netinu, gefur það foreldrinu tækifæri til að fylgjast með netferðalagi barnsins. Um leið býður samveran upp á að barn og foreldri læri saman, og séu saman.
